ژن و مێردێک لە هیندستان بەردباران کران

له‌ ویلایه‌تی كارناتاكا-ی هیندستان، ژن و مێردێك كه‌ خاوه‌نی دوو منداڵن، به‌ هۆی ئه‌و‌ه‌ی له‌ده‌ره‌وه‌ی نه‌ریت و چینایه‌تی هاوسه‌رگیریان كردووه‌ له‌ لایه‌ن كه‌سوكاریانه‌وه‌ به‌ردباران كران و كوژران.

 

 

به‌ پێی ئه‌و هه‌واڵانه‌ی له‌ راگه‌یاندنی هیندستاندا بڵاوكراوه‌ته‌وه‌، رامێش و گانگاڤای ٢٩ ساڵ كه‌ سێ ساڵ پێش ئێستا رایان كرد و، هاوسه‌رگیریان كردووه‌، به‌مه‌به‌ستی سه‌ردانكردنی خانه‌واده‌كانیان سه‌ردانی گوونده‌كه‌یان كردبووه‌وه‌.

 

هاوکات به‌رپرسانی پۆلیس ئاماژه‌یان به‌وه‌ كرد كه‌ ئه‌و ژن و مێرده‌ گه‌نجه‌ له‌ لایه‌ن برا، مام و چه‌ند كه‌سێكی ژنه‌كه‌وه‌ له‌ شوێنێكی نزیك گوونده‌كه‌ به‌ردباران كراون و كوژراون.

 

هەروەها به‌رپرسه‌كان باسیان له‌وه‌ كردووه‌ كه‌ برای ژنه‌كه‌، مام و كه‌سێكی دیكه‌ كه‌ له‌و تاوانه‌وه‌ تێوه‌گلاون ده‌ستگیركراون و، لێكۆڵینه‌وه‌ له‌ رووداوه‌كه‌ ده‌ستیپێكردووه‌.

 

شایەنی باسە ژن و مێرده‌كه‌ به‌هۆی ئه‌وه‌ی خێزانه‌كانیان رازی نه‌بوون سێ ساڵ پێش ئێستا رایانكردووه‌ و هاوسه‌رگیریان كردووه‌ و، له‌ شاری بانگالۆر-ی پایته‌ختی ویلایه‌ته‌كه‌ نیشته‌جێبوون و، خاوه‌نی دوو منداڵن.

 

جێگای ئاماژەیە له‌ هیندستان، ژماره‌یه‌كی زۆر ژن و مێرد به‌ هۆی ئه‌وه‌ی له‌ده‌ره‌وه‌ی چینایه‌تی هاوسه‌رگیریان كردووه‌، بوونه‌ته‌ قوربانیی ده‌ستی خانه‌واده‌ و كه‌سوكاریان.

 

لە لایەکی دیکەوە به‌ پێی داتاكانی نه‌ته‌وه‌ یه‌كگرتووه‌كان، له‌ كۆی پێنج هه‌زار تاوانی كوشتن كه‌ ساڵانه‌ له‌ سه‌رتاسه‌ری جیهان رووده‌دات هه‌زار تاوانیان له‌ هیندستان رووده‌ده‌ن.

وەڵامێک بنووسە