هەولێر.. ١٠٩هەمین ساڵیادی رۆژی رۆژنامەگەری تورکمانی بەرز راگیرا

ئەمرۆ ٢٥ی شوبات-ی ٢٠٢٠ لە هەولێر بە ئامادەبوونی ئایدن مەعروف وەزیری هەرێم بۆ کاروباری پێکهاتەکان، دکتۆر بەشیر حەداد جێگری دووەمی سەرۆکی ئەنجومەنی نوێنەرانی عێڕاق هاکان کاراچای، کونسوڵی گشتی تورکیا، زۆرێک لە سەرۆک پارت و لایەنە سیاسییەکانی تورکمان و رۆشنبیران رۆژی رۆژنامەگەری تورکمانی بەرز راگیرا.

 

 

 

رۆژنامەی حەوادیس کە یەکەم رۆژنامەی تورکمانی بوو، بۆ یەکەم جار لە ٢٥ی شوبات-ی ساڵی ١٩١١ بڵاوکرایەوە. ساڵرۆژی دامەزراندنی ئەو رۆژنامەیە کە بۆ ماوەی ٨ ساڵ بەردەوام بوو، کرا بە “رۆژی رۆژنامەگەری تورکمان” و هەموو ساڵێک لەو رۆژەدا یادی دەکرێتەوە.

 

سەرەتای مەراسیمەکە ئایدن مەعروف وەزیری هەرێم بۆ کاروباری پێکهاتەکان وتەیەکی پێشکەشکرد تێیدا سەرنجی خستە سەر گرنگی ئەم رۆژە و گرنگی رۆژنامەگەریی بەتایبەتی لەنێو تورکماندا، هەروەها  یادی ١٠٩.هەمین ساڵیادی رۆژنامەگەری تورکمانی لە هەموو لایەک پیرۆزکرد.

 

هاوکات بەشیر حەداد جێگری دووەمی سەرۆکی ئەنجومەنی نوێنەرانی عێڕاق، وتارێکی پێشکەشکرد ئاماژەی بە گرنگی بەفەرمی بونی ساڵیادی رۆژی رۆژنامەگەری تورکمانی دا، سوپاسی ئەو لایەنانەی کرد کە یارمەتی ئەو پرۆژە یاسایەیان داوە بۆ ئەوەی ببێت بە رۆژێکی فەرمی.

 

جێگای ئاماژەیە لە رێورەسمەکەدا خەڵاتی رێزلێنان بەخشرایە کۆمەڵێک کەسایەتی میدیایی و رۆشەنبیری تورکمان، ئاژانسی میدیایی تورکمان “تەبا” وەکو دامەزراوەیەکی تورکمانی خەڵاتی رێزلێنانی پێبەخشرا.

 

شایەنی باسە رۆژی یەکشەممە ١٢ی کانوونی دووەمی ٢٠٢٠، پەرلەمانی کوردستان-عێراق، دانیشتنی ژمارە ١٣ی ئاسایی خۆی ئەنجام داو تێیدا پرۆژە بڕیاری  “بۆنە فەرمییەکانی نەتەوەی تورکمان”  خستە دەنگدانەوە و بە دەنگی ٧٣ پەرلەمانتار پەسەند کرا و بە فەرمی رۆژی ٢٥ـی شوبات بە رۆژی رۆژنامەگەری تورکمانی ناسێندرا.

 

بۆنە فەرمییەکانی نەتەوەی تورکمان بریتین لە ١٧ـی تشرینی دووەم کە ساڵیادی کردنەوەی قوتابخانە تورکمانییەکانە لە هەولێر(ئەربیل) و کفری، بە رۆژی زمان و کەلتووری تورکمانی دابنرێت، هەروەها ٢٥ـی شوباتی هەر ساڵێک بە رۆژی رۆژنامەگەری تورکمانی دابنرێت.

وەڵامێک بنووسە