نەتەوە یەکگرتووەکان لەبارەی پێکدادانەکانی ئوکرانیا ئامارێک بڵاودەکاتەوە

کۆمیسیاری باڵای مافی مرۆڤی نەتەوە یەکگرتووەکان رایگەیاند، له‌سه‌ره‌تای سه‌رهه‌ڵدانی پێكدادانی نێوان جووداخوازه‌كانی لایه‌نگری رووسیا و هێزه‌كانی سوپای ئۆكراینا تا ئێستا ١٠ هەزار و ٢٢٥ کەس گیانیان لەدەستداوە.

 

كۆمسیاری باڵای مافی مرۆڤی نه‌ته‌وه‌ یه‌كگرتووه‌كان، دوایین راپۆرتی له‌باره‌ی دۆخی مافی مرۆڤ له‌ ئۆكراینا بڵاوكرده‌وه‌.

 

بە پێی راپۆرتەکە لەسەرەتای سەرهەڵدانی پێکدادانەکانی نێوان جووداخوازه‌كانی لایه‌نگری رووسیا و هێزه‌كانی سوپای ئۆكراینا له‌ رۆژهه‌ڵاتی ئه‌و وڵاته‌ کە ساڵی ٢٠١٤ سەریانهەڵدا، به‌ خه‌ڵكی سڤیل و سه‌ربازانی سوپای ئۆكراینا و جووداخوازه‌كانی لایه‌نگری رووسیاوه‌، تا ئێستا، ٣٤ هه‌زار و ٧٦٦ كه‌س زیاینان به‌ركه‌وتووه. لەو چوارچێوەیەشدا‌ ١٠ هەزار و ٢٢٥ کەس گیانیان لەدەستداوە و ٢٤ هەزار و ٥٤١ کەسیش برینداربوون.

 

لە راپۆرتەکە ئەوەش خراوەتەڕوو، ٢ هه‌زار و ٥٠٥ كه‌س له‌وانه‌ی گیانیان له‌ده‌ستداوه‌ خه‌ڵكی سڤیل بوون و ته‌نها له‌ ١٦ی ئایار تا ١٥ی ئاب ٢٦ كه‌سی سڤیل گیانیان له‌ده‌ستداوه‌ و ١٣٥ی تریش برینداربوون.

 

هه‌روه‌ها ڕاپۆرته‌كه‌دا ئاماژه‌ به‌وه‌ دراوه‌، ئه‌و ژمارانه‌ ٢٩٨ سه‌رنشینه‌كه‌ی فڕۆكه‌ مالیزییه‌كه‌ له‌خۆناگرێت كه‌ ١٧ی ته‌مووزی ٢٠١٤ خرایه‌خواره‌وه‌.

وەڵامێک بنووسە