مەراسیمی یادکردنەوەی رۆژی لەدایکبوونی پێغەمبەر محمد (د.خ) لە قەڵای هەولێر بەڕێوەچوو

ئەمرۆ هەینی ٨ـی تشرینی دووەم لەسەر قەڵای هەولێر(ئەربیل)، پارێزگاری هەولێر هەڵستا بەسازکردنی مەراسیمێک بۆ یادکردنەوەی رۆژی لە دایکبوونی پێغەمبەر ئیسلام محمد (دخ) لەسەربێت.

 

 

شایەنی باسە هەریەکە لە فەرسەت سۆفی، پارێزگاری هەولێر(ئەربیل) و نەوزاد هادی پارێزگاری، پێشووی هەولێر(ئەربیل) و نەبەز عەبدولحەمید، قایمقامی هەولێر(ئەربیل) و پشتیوان سادق، وەزیری ئەوقافی هەرێم و چەندین زانای ئایینی لە شارەکانی ھەرێم بەشداریان لە مەراسیمەکە کرد.

 

سەرەتای مەراسیمەکە بە خوێندنی چەند ئایەتێک لە قورئانی پیرۆز دەستپێکرا، دواتر وتارێک لەلایەن فەرسەت سۆفی، پارێزگاری هەولێر (ئەربیل) سەبارەت بە یادی لەدایکبوونی پەیامبەری ئیسلام  پێشکەشکرا و دواتریش چەند مەولودێک لەلایەن (کۆمەڵەی قورئان خوێنانی کوردستان) پێشکەش بە ئامادەبووانی رێورەسمەکە کرا.

 

 

ساڵانە موسڵمانان لە زۆربەی وڵاتانی ئیسلامی لە ١٢ـی رەبیعول ئەوەل یادی لەدایک بوونی پەیامبەری ئیسلام موحەمەد (د.خ) لەسەر بێ دەکەنەوە.

 

هاوڵاتیانی شاری هەولێڕ (ئەربیل) بەتایبەت ساڵانە بە جۆش و خرۆشەوە بەشداری لەم یادە دەکەن، لەم رۆژەدا لە بازاری قەیسەری و ماڵەکان و مزگەوتەکان و ھۆڵەکانی تایبەت بە بۆنە ئایینییەکان، مەولود بۆ ئەم بۆنەیە ساز دەکەن و شیرینی دەبەخشەنەوە.

 

 

شێخ نیاز، بەرێوبەری لقی هەولێری یەکێتی زانایانی ئیسلام لە لێدوانێکیدا بۆ پەیامنێری تەبا رایگەیاند، “سەرەتا پیرۆزبایەکی گەرم لەخۆمان و سەرجەم موسڵمانان دەکەین بەبۆنەی گەرانەوەی یادی فەخری کائینات پێغەمبەری پێشەوامان موحەمەد (د.خ) لەسەر بێ، لەراستیدا گەرانەوەی ئەم یادە یەعنی گەرانەوەی یادەوەری هەڵگیرسانی چرایەکی پرشنگدار بەسەر زەویدا، لەراستیدا لەدایگ بوونی پێغەمبەر بوە مایەی نوێ بونەوەی ژیانی مرۆڤایەتی، بۆیە ئێمە وەکو زانایانی ئاینی لەم رۆژەدا بەهەل دەزانین کە هانی موسڵمانان بدەین یەکتریان خۆش بوێت دەست بە سونەتی پێغەمبەرەوە بگرن، وە بەردەوام بن لە پاپەند بوونو پەیوەست بوون بە خۆشویستنی ئەو پێغەمبەرەبە جێبەچێکردنی بەرنامەی سونەتی ئەو پێغەمبەرە چونکە لەراستیدا بەختەوەری سەرفرازی لە پاپەند بوونە بە ئیمان و باوەر”.

 

 

جێگای ئاماژەیە وەیسی سەعید وەیسی ئەندامی لیژنه‌ی ئه‌وقاف و كاروباری ئاینی له‌ په‌رله‌مانی كوردستانی عێراق رایگەیاند، “پێشەکی بەناوی لێژنەی ئەوقاف و کاروباری ئاینی لە پەرلەمانی کوردستان گەرمترین پیرۆزباییمان ئاراستەی خەڵکی کوردستان بکەین، بەبۆنەی ساڵیادی لەدایک بوونی پێغەمبەری ئیسلام حەزەرەتی موحەمەدل موستەفا، هیوادارین ئەم یادە ببێتە بەمایەی خێڕ و خوشی   و زیاتر بەرقەرار بوونی ئاشتی و تەبایی و پێکەە ژیان لە نێوان سەرجەم پێکهاتەکانی هەرێمی کوردستان، هەمومان دەزانین ساڵانە لە هەرێمی کوردستان بایەخێکی تایبەت بە یادی لە دایک بوونی پێغەمبەری ئیسلام دەدرێت ئەوەی مایەی خۆشحاڵیە ئەم یادکردنەوە بویتە بەشێک لە کەلتوری نەتەوەیمان کە ساڵانە لەسەر ئاستی فەرمی ئەم یادە بەرز رادەگیرێ”.

 

ناوبراو لە درێژەی قسەکانیدا وتی، “بۆیەش بە دڵنیاییەوە هەوڵێری پایتەختی هەرێمی کوردستان ئەو سەروەریە گەورەیەی بەبەر کەوتوە کە توانیویەتی بیرۆکەی مەولود لە هەولێرەوە سەر هەلبدات کە کەسایەتی ئەم شارە سوڵتان موزەفەرەدین کە بویتە بەشێک هەم لە مێژوی ئیسلام هەم لە مێژوی شاری هەولێر کە بەر لە ٨٠٠ ساڵ بەر لە ئێستا ئەو بیرۆکەی هەبو یادی لەدایک بونی پێغەمبەری ئیسلام بەرز رابگرێت کە، لەداوییدا جهامی ئیسلامی تەماشای خەڵکی هەولێر شاری هەولێریان کرد، بۆیە هیوادارین چۆن لە ساڵانی رابردودا بایەخ بە یادە پیرۆزە دراوە ئەم ساڵێش بە هەمان شێوە بە خێرو خۆشی بەسەرمان بگەرێتەوە”.

 

 

هاوکات بەشداربوێکی تری مەراسیمەکە دەربارەی ئەو رۆژەوە بە مایکی تەبا-ـی راگەیاند،”پێشەکی لە رۆژی لەدایک بوونی سەروەرمان پیرۆزبایی لە گشت موسوڵمانان بە تایبەتی موسڵمانانی شاری هەلێر دەکەم، ئەم رۆژە رۆژێکی پیرۆزو موبارەکە،ئینشائەڵا بەهۆی ئەم رۆژە پیرۆزە موسڵمانان دڵیان خۆش دەبێت، بەراستی شتێکی جوانە لەم رۆژەدا مەولود دەخیندرێتەوە و شیرینەمەنی دابەش دەکرێت، بەڵام داوا لە موسوڵمانان دەکەم لەم رۆژەدا دور بن لە کارێک کە موبالەغەی تێدا بی شتێک کە  لە ئیسلامدا نەبێت نەیکەن”.

 

هەروەها بەشی راگەیاندنی پارێزگای هەولێر لایخۆیەوە رایگەیاندبوو، “بۆ بەرزڕاگرتنی ڕۆژی لە دایكبوونی پێغەمبەری ئیسلام محمد (د.خ)، پارێزگای هەولێر بۆ پیرۆزكردنی ئەم ڕۆژە، مەراسیمێك لە سەر قەڵای هەولێر ڕێكدەخات”.

 

سبەی شەممەش هەر بەو بۆنەیەوە چەندین مەڕاسیمی مەولود خوێندنەوە لە شارەکانی هەرێم و زۆربەری شارەکانی تری عێراق بەڕێوەدەچێت.

 

هەموو ساڵێك لە یادی لەدایكبوونی پێغەمبەری ئیسلام(د.خ) لە سەرجەم شار و شارۆچكەكانی هەرێمی كوردستان مەراسیمی مەولود ئەنجام دەدرێت.

 

کلیک بکەن بۆ بینینی فۆتۆگەلەری هەواڵەکە

 

هەواڵ: عەبدولسەلام هیشام

فۆتۆ: محمد امین

وەڵامێک بنووسە