عادل عەبدولمەهدی بڕیارێکی ئەمریکا ئیدانە دەکات

 سەرۆكوەزیرانی دەستلەكاركێشاوەی عێراق وەك ئاماژەیەك بۆ سزاكانی ئەم دواییەی ئەمریكا رایگەیاند، ئیدانەی ئەوە دەكەن كە ناوی ژمارەیەك سەركردە و كەسایەتی عێراقی خراونەتە ناو لییستی سزاكانەوە.

 

 

لە راگەیەندراوێكدا عادل عەبدولمەهدی، سەرۆکوەزیرانی دەستلەکارکێشاوی عێراق وەک ئاماژەیەک بۆ سزاکانی ئەم دواییەی ئەمریکا رایگەیاند، “ئیدانەی ئەوەمان كردووە، ناوی ژمارەیەك سەركردە و كەسایەتی عێراق كە رۆڵیان هەبووە لە شەڕەكانی دژبە داعش لە لایەن وڵاتانەوە كە پەیوەندیی و رێككەوتنەمان لەگەڵیاندا هەیە، خراونەتە لییستی سزاكانەوە”.

 

هاوکات عادل عەبدولمەهدی راشیگەیاندووە، “هەروەها ئیدانەی ئەوە دەكەین كە لە لایەن خۆپیشاندەران و میدیاكانەوە، سووكایەتی بە وێنەی سەرۆكی ئەو وڵاتانەی كە پەیوەندیی و رێككەوتنمان لەگەڵیاندا هەیە، دەكرێت”.

 

شایەنی باسە عادل عەبدولمەهدی ئاماژەی بەوەیشكردووە كە سووكایەتیكردن بە وێنەی كەسایەتییە ناسراوەكانی عێراق، قبوڵكراو نییە و ئیدانەی دەكەن و وتوویەتیشی، “سەرجەم ئەو كردانە زیان بە عێراق و گەلەكەی دەگەیەنێت، جگە لەوەیش دەبنە هۆی هاندان بۆ توندئاژۆیی و رق و كینە لەگەڵ خراپكردنی ناوبانگی عێراق و دواتر ئەنجامێكی مەترسیداری لێدەكەوێتەوە كە ئەستەم دەبێت كۆنترۆڵ بكرێت”.

 

رۆژی هەینی رابردوو وەزارەتی گەنجینەی ئەمریكا رایگەیاندبوو كە بەهۆی پێشێلكردنی مافەكانی مرۆڤ و تێوەگلان لە گەندەڵی، سزای بەسەر سەركردەی عەسائیب ئەهلی حەق، قەیس خەزعەلی و براكەی، لەیس خەزعەلی لەگەڵ بەڕێوەبەری ئاسایشی حەشدی شەعبی، حوسێن فالح ناسراو بە ئەبو زەینەب ئەللامی، هەروەها بازرگان و كەسایەتی عێراق، خەمیس فەرحان خەنجەردا سەپاندووە.

وەڵامێک بنووسە