سەندیکای رۆژنامەنووسان: ٣ رۆژنامەنووس دەستگیر کراون

سەندیکای رۆژنامەنوسانی کوردستان رایگەیاند، “ئاسایشی هەریر سێ میدیاکاری دەستگیرکردووەو سوکایەتیان پێکراوەو مۆبایلەکانیان پشكنراوە”.
ئەمڕۆ هەینی، نوسینگەی سۆرانی سەندیکای رۆژنامەنوسانی کوردستان راگەیەنراوێکی بڵاوکردەوەو تیایدا هاتووە، “ئاسایشی ناحیەی هەریر سێ میدیاکارو پەیامنێری کەناڵەکانی ئێن ئاڕ تی و سپێدە و پەیامیان لەکاتی روماڵ و کاری رۆژنامەوانیدا دەسگیرکردووه‌.”
ئەوەش خراوەتەڕو، “بە وتەی هەر سێ میدیاکار و پەیامنێرەکە دوای دەستگیرکردنیان (عەبدۆ روستای، ئازاد ئۆمەراوەی، یونس حەمەد) ماوەی دوو کاتژمێر دەستبەسەرکراون و مۆبایلەکانیشیان پشکنیون و دواتر قسەی ناشیرینیان پێ وتراوە و سوکایەتیان پێکردون و بە تێکدەر و ئاژاوەگێڕ وێنایان کردون.”
سەندیکای رۆژنامەنوسان باسی لەوەشکردووە، “ئەم کارە ئیدانە دەکەین، چونکە ئێمە پێمانوایە دەسگیرکردن و رێگریکردن و ئیهانەکردنی رۆژنامەوانان، پێچەوانەی یاسای ژمارە ٣٥ ساڵی ٢٠٠٧ و یاسای ژمارە ١١ی ساڵی ٢٠١٣ی مافی بەدەستهێنانی زانیاری.”
دەشڵێت، جەخت لەوەدەکەنەوە، کە رۆژنامەنووس و میدیاکاران لەچوارچێوەی یاسادا ئازاد و رێگەپێدراون هەر گردبوونەوە و خۆپیشاندان و هەر چەشنە چالاکییەک روماڵ بکەن و ئازاد و سەربەستیشن لە روماڵکردنی سەرجەم کارە میدیای و رۆژنامەوانیەکان.